Senduvida

10 km. arredor do campus de Vigo

admin — Thu, 18 Mar 2010 10:10:16 +0000

O vindeiro 21 de marzo terá lugar no campus de Vigo a cuarta edición dos 10 Km Cidade Universitaria, organizados polo Servizo de Deportes da Uvigo. Os participantes darán tres voltas ao campus, nun circuíto deseñado para todos os públicos, no que se eliminaron os desniveis presentes noutras edicións.

Esta proba ten especial importancia xa que é un evento perfecto a modo de preparación da Vig-Bay, a media maratón entre Vigo e Baiona, que se disputará o 11 de abril.

Os participantes estarán dividos en 6 categoría, desde os máis xoves até os veteranos. Os tres primeiros clasificados da clasificación xeral masculina e feminina recibirán, respectivamente, premios de 400, 300 e 200 €. Ademáis, todos os participantes recibirán unha camiseta conmemorativa.

Música misturada con humor na Intercultural

admin — Mon, 15 Mar 2010 17:20:51 +0000

Este mércores 17 de marzo o músico e humorista Riki López actuará ás 20 horas na Sala Multiusos do Edificio de Facultades do campus de Ourense, dentro do programa de actividades da Intercultural para o segundo cuatrimestre.

Riki López é un cantautor cómico con seis discos ás súas costas, tres dos cales autoeditados. Salta a fama como colaborador do programa Gomaespuma, que lle producen o seu disco El hombre más feliz del mundo. A Ourense chega co seu espectáculo Buenrollitina, tamén editado en CD, cargado de filosofía nocturna e urbana, de situacións cotiás cargadas de sarcasmo e ironía.

Comeza o Mercadillo x Haiti

admin — Tue, 09 Mar 2010 16:48:01 +0000

Despois de pasar o último més recollendo os libros doados pola comunidade universitaria, a Biblioteca Universitaria da Uvigo organiza o Mercadillo Solidario por Haití, co obxectivo de recadar diñeiro para enviar, vía Cruz Vermella Internacional, aos damnificados da catástrofe haitiana.

Os libros doados serán vendidos ao prezo único de 4 euros, destinando a totalidade da recadazón á iniciativa. Así, os días 10,11,12,15 e 16 de marzo o mercadillo estará, respectivamente, en horario de 10 a 18 horas, nos seguintes lugares:

Mércores 10 de marzo: no centro comercial do campus de Vigo (na praza Miralles) e en Tradución. Pola tarde en Torrecedeira tamén.
Xoves 11 de marzo: no centro comercial, en económicas e en Torrecedeira.
Venres 12 de marzo: na Biblioteca Central de Vigo
Luns 15 de marzo: en Ciencias.
Martes 16 de marzo: no centro comercial.

Adestradores de Depor e Celta falan en Pontevedra

admin — Tue, 09 Mar 2010 16:35:25 +0000

Con motivo da presentación do libro Fútbol de base, Miguel Ángel Lotina e Eusebio Sacristán, adestradores de Deportivo da Coruña e Celta de Vigo respectivamente, acompañarán a Luis Casáis, Carlos Lago e Eduardo Domínguez no evento.

Os profesores, vinculados ao grupo de investigación HI20, destacan as incorporacións de xogadores dos filiais aos planteis de ambos equipos, así como a presenza de investigadores do grupo en equipos que tamén traballan na promoción dos xogadores de base.

A presentación será emitida en directo o xoves 11 de marzo pola Radio Galega desde a facultade de Ciencias da Educación e do Deporte ás 20 horas.

Arte alternativo no FestivALT 10

admin — Mon, 08 Mar 2010 18:04:56 +0000

O Festival alternativo das artes escénicas de Vigo volve pola súa novena edición á cidade olívica. Do 11 ao 20 de marzo o MARCO, o campus de Vigo e a Casa das artes verán pasar polas súas tarimas a compañías de todo o estado.

Pola Universidade de Vigo achegarase a compañía francesa Etxea, formada por Frédéric Etcheverry e Gloria Aras, coa súa obra Exstrada, unha obra de teatro experimental sen texto nin música, elaborada só con linguaxe corporal. Será ás 14 horas do xoves 11 de marzo no centro comercial do campus de Vigo.

Jazz para comezar a Intercultural 2010

admin — Mon, 08 Mar 2010 13:05:11 +0000

Sete serán as intervencións culturais da Intercultural 2010 para o segundo cuatrimestre deste curso. O programa foi presentado a semana pasada por Juan Franciso Gálvez, vicerreitor do campus de Ourense, e Filemón Rivas, xestor de Actividades Culturais. Cinema, música, máxia e especialmente teatro, coa MITEU, serán as linguaxes escollidas para as intervencións.

E para dar inicio ao programa o escollido foi o Víctor Prieto Trio, liderado polo acordeonista ourensán Víctor Prieto, que actuará pola primeira vez en Ourense coa súa formación, completada polo baixista Jorg Roeder e o batería Otis Brown III.

Os tres ofrecerán un espectáculo de jazz con influencias da música latina e celta no Centro Cultural da Deputación de Ourense ás 20 horas do martes 9 de marzo, unha mostra de virtuosismo patente nos catro traballos discográficos da formación publicados até o día de hoxe.

Proxeccións, música e debate nas Xeiras sobre a lingua galega

admin — Sun, 07 Mar 2010 09:00:57 +0000

As II Xeiras sobre a lingua galega, organizadas polos Comités, servirán de excusa para ver no campus de Vigo, e mais concretamente na sala I do Edificio Miralles, a expertos na materia e a persoeiros da cultura galega.

Así, os profesores Pilar García Negro, Valentim R. Fagim, Henrique Monteagudo ou Henrique Costas, falaran do galego do ensino, das diferentes propostas de normalización e normativización ou das plataformas existentes en defensa da lingua; incluíndo, a última hora, ao Secretario Xeral de Política Lingüística, Anxo Lorenzo, que falará o venres 12 de 9 a 11 horas.

Especial atención merecen o gurú da blogoesfera galega Berto Yañez, co-creador de EuFalo.tv, ou os músicos Xurxo Souto, Mini e Mero que falaran do movemento bravú e da música tradicional, respectivamente, ofrecendo os dous últimos unha actuación musical ás 18.15 horas do martes día 9.

Tamén chama a atención a presenza dos humoristas gráficos Kiko da Silva, director da revista Retranca, ou Xose Lois González, O Carrabouxo, que falaran o xoves 11 ás 17.45 horas.

Consulta o programa e dálle á lingua.

A muller e a comunicación a debate en Pontevedra

admin — Fri, 05 Mar 2010 14:08:34 +0000

A biblioteca central do campus de Pontevedra albergará unha mesa-coloquio titulada Muller e comunicación na que participaran Anna Amorós, Cristina Caruncho, Xesús Laxe, Amada Traba e Montserrat Vázquez. Será o martes 9 de marzo ás 12 horas.

Tamén con motivo do Día internacional da Muller, a Área de Igualdade da Universidade de Vigo presentará a curtametraxa Bata por fora (muller por dentro), desta vez ás 13.15 horas na biblioteca universitaria.

Preséntase en Ourense a curta Bata por fora (muller por dentro)

admin — Fri, 05 Mar 2010 13:56:22 +0000

O próximo mércores 10 de marzo presentarase na Biblioteca Universitaria do campus de Ourense a curtametraxe experimental Bata por fora (muller por dentro) de Claudia Brenlla. Organizado pola Área de Igualdade da Universidade de Vigo, a curta fala das mulleres que usan bata, especialmente as de cadros, e da propia bata como símbolo.

Tamén en Ourense impartirase o curso formativo A igualdade dende o eido social, entre os días 8 e 12 de marzo en horario de mañá de 10 a 14 horas, no pavillón 1 do campus.

Paralelamente a biblioteca universitaria albergará unha exposición de batas entre os días 8 e 11 de marzo. Ambas actividades foron organizadas co gallo do Día Internacional da Muller, que se celebra o 8 de marzo.

A imaxe da Uvigo na internet renovada

admin — Wed, 03 Mar 2010 13:17:34 +0000

A nova imaxe da páxina central da Universidade de Vigo, uvigo.es, foi estreada o pasado 1 de marzo. A nova páxina sae á luz despois de meses de traballo na nova imaxe corporativa da universidade, que cristalizou no deseño da nova web, máis moderno e sobrio que o anterior e con especial atención á accesibilidade e o servizo á toda a comunidade universitaria.

O portal da UVigo ten agora as noticias do Duvi como motivo central, para estar ao tanto do que está a pasar na Universidade así como moita información sobre a universidade: os novos títulos, investigación bolsas, etc.

Neste momento están activadas as súas versións en galego e español, en breve estará dispoñible a versión en inglés. Pasa e botalle unha ollada!